Ислом Бирдамлиги ўйинлари. Учта медаль билан учинчи ўриндамиз

Хабарингиз бор, ислом оламидаги ушбу нуфузли мусобақада Ўзбекистон терма жамоасининг 265 нафар атлети 23 та спорт тури бўйича юртимиз шарафини ҳимоя қилади. Биринчилардан бўлиб велоспортчиларимиз спортчиларимизнинг иштирокини бошлаб берди. 

Велоспортнинг трек йўналишида кечган мусобақанинг кечаги куни 1 та кумуш ва 1 та бронза медалини қўлга киритдик. Қозоғистон терма жамоаси ушбу баҳсларда 2 та олтин, 1 та бронза медалига сазовор бўлди. 

Янги қуриб битказилган Konya Olympic Velodrome трекида кечган мусобақасининг аёллар ўртасидаги индивидуал пойга баҳсларида 14, эркакларда эса 24 нафар иштирокчи медаллар учун стартга чиқди. 

Аёллар ўртасидаги индивидуал пойгада қозоғистонлик Рината Султонова олтин, ҳамюртимиз Янина Кускова кумуш, яна бир қозоқ велоспортчиси Марина Кузмина бронза медалини қўлга киритди. 

Эркаклар ўртасидаги баҳсларда эса олтин медаль тақдири қозоғистонлик спортчилар ўртасида ҳал бўлди. Алишер Жумахан Ислом Бирдамлиги ўйинлари чемпиони, Дмитрий Носков кумуш медаль соҳибига айланди. Бу йўналишда ҳамюртимиз Алексей Фомовский бронза медалига сазовор бўлди. 

Шу тариқа, икки кунлик велотрек мусобақаси якунига кўра Ўзбекистон терма жамоаси 1 та кумуш, 2 та бронза медалини қўлга киритди. Илк кунги баҳсларда София Каримова терма жамоамизга ушбу мусобақадаги илк медални тақдим этган эди.

Бугунги кун беллашувлари олдидан Қозоғистон терма жамоаси 3 та олтин, 1 та кумуш, 2 та бронза медали билан умумжамоа ҳисобида биринчи ўринни эгаллаб турибди. БАА терма жамоаси 1 та олтин медаль билан иккинчи ўринни банд этган бўлса, кучли учликка Ўзбекистон терма жамоаси 1 та кумуш, 2 та бронза медали билан якун ясаган. Кейинги ўринлардаги Эрон ва Малайзия делегацияларида 1 тадан кумуш медаль бор.