Ислом бирдамлиги ўйинларидаги медалларимиз сони 39 тага етди, 11 таси олтин + ФОТО

Кечаги кунги беллашувларда спортчиларимиз жами 16 та медаль қўлга киритишди. Шундан 6 таси олтин, 4 таси кумуш, 6 таси бронза медалларидир. Таэквондочимиз Шуҳрат Салаев, эркин курашчимиз Жаҳонгирмирзо Туробов, баландлик сакраш секторида 1.97 см натижа қайд этган Сафина Садуллаева, босқон улоқтирувчимиз Шуҳрат Хўжаев, пара енгил атлетика спорт турининг баландликка сакраш баҳсларида Омадбек Ҳасанов (1.90 см) ҳамда велоспортчимиз Ольга Забелинская кечаги беллашувларда Ўзбекистон спорт делегациясига энг юқори пробали медални тақдим этишди. 

Шу тариқа, Ўзбекистон терма жамоаси бугунги кун баҳслари олдидан 56 давлат иштирок этаётган мусобақада 11 та олтин, 10 та кумуш, 18 та бронза, жами 39 та медаль билан умумжамоа ҳисобида 3-ўринга кўтарилиб олди. 

Туркия терма жамоаси ҳамон катта фарқ билан пешқадамлик қиляпти. Мезбонлар 34 та олтин, 30 та кумуш, 25 та бронза, жами 89 та медални қўлга киритиб улгуришди. Эрон 15 та олтин, 14 та кумуш, 10 та бронза медали билан 2-ўринда бормоқда. Ўзбекистон кучли учликка якун ясаган бўлса, Озарбайжон 7 та олтин, 10 та кумуш, 8 та бронза медали билан 4-ўринни банд этган. Ҳисобида 6 та олтин, 4 та кумуш, 15 та бронза медали бўлган Қозоғистон 3-ўриндан 6-поғонага тушиб кетди.