“Ислом бирдамлик ўйинлари”. Олтибоев ярим финалда, қолганлар бронза учун курашади

Бугун мусобақанинг дзюдо баҳсларида навбатдаги медаллар жамланмаси ўз эгаларига топширилади. Бугун эркаклар -81, -90, -100 ҳамда +100 кг вазн тоифаларида татамига чиқишяпти. Улар орасида ўзбекистонлик дзюдочилар ҳам бор.

Мутлоқ вазн тоифасидаги вакилимиз Бекмурод Олтибоев иштирокини тўғрида-тўғри иккинчи даврадан бошлади. Бу босқичда сенегаллик Мбагник Ндиайени таслим этиб, ярим финалга йўл олди.

Энди Олтибоев кечки дастурда жазоирлик Наджиб Теммарга қарши финал чиптаси учун татамига чиқади. Қолган дзюдочиларимиз ўтиш турнири орқали бронза медали учун курашишади.

-81 кг вазнда ярим финалга етиб келган дзюдочимиз Давлат Бобонов ҳозиргина якунига етган учрашувда туркиялик Илкер Гулдуренга ютқазиб қўйди. Энди у бронза медали учун татамига чиқади. Бобоновнинг рақиби туркманистонлик ёки қатарлик спортчи бўлади.  

Ҳамюртларимиздан Давронбек Сатторов (-90 кг) ва Сойибжон Қурбонов (-100 кг) илк учрашувларидаёқ мағлубиятга учрашди ва энди улар бронза медали учун ўтиш баҳсида татамига чиқишади.