Исломжон Баҳромов, Рустам Ассакалов, Маҳмуд Бахшиллоев олтин, Мўминжон Абдуллаев бронза учун гиламга чиқади

Қувонарлиси, кечки дастурда уч нафар юнон-рум курашчимиз нуфузли мусобақа медаллари учун гиламга чиқади. 63 кг вазн тоифасида юртимиз шарафини ҳимоя қилаётган Исломжон Баҳромовдан сўнг Маҳмуд Бахшиллоев (67 кг) ва Рустам Ассакалов (97 кг) ҳам финал йўлланмасини қўлга киритишди. 

Энг тажрибали "классигимиз" ярим финалда норвегиялик Феликс Балдауфни 7-1 ҳисобида енгди. Унинг олтин медаль учун кечадиган беллашувдаги рақиби финляндиялик Арви Мартин Саволайнен бўлади.    

Маҳмуд Бахшиллоев эса ярим финалда туркиялик Фуркан Йилдизни 4-3 ҳисобида мағлубиятга учратди. Бухоролик полвонимиз финалда норвегиялик Мортен Торесенга қарши баҳс олиб боради. 

Учта Олимпиада иштирокчиси Мўминжон Абдуллаев эса кечки дастурда қозоғистонлик Алимжан Сиздиковга қарши бронза медали учун гиламга чиқади. У бироз аввал бронза йўлидаги ўтиш баҳсида финляндиялик Конста Маеинпаини 5-1 ҳисобида енгди.