Исроил Гран-приси медалсиз, лекин қимматли очколар билан якунланди

Ушбу мусобақада сайёрамизнинг 5та қитъаси 54 давлатидан 400 нафарга яқин полвонлар иштирок этди. Улар орасида 18 нафар дзюдочимиз ҳам медаллар ҳамда Токио-2020 Олимпиадасининг муҳим рейтинг очколари учун баҳс олиб боришди. 

Афсуски, Исроил Гран-присида медал бўлмади. Турнирдаги биз учун энг яхши натижани -66 кг вазн тоифасидаги Сардор Нуруллаев ҳамда энг оғир - +100 кг вазндаги полвонимиз, Абдулла Тангриевнинг издоши сифатида қаралаётган Бекмурод Олтибоев қайд этди. Ҳар икки вакилимиз бронза медали учун кечган баҳсларда имкониятни бой бериб, бешинчи ўрин билан кифояланишди. Улар Токио-2020 йўлидаги қимматли 252 рейтинг очкосига эга бўлишди. Бу эса ҳар икки дзюдочимизнинг жаҳон рейтингидаги ўринларининг яхшиланишига замин яратади.  

Ҳамюртларимиздан Гулноза Матниязова еттинчи ўринни банд этди. Хоразмлик спортчи қизимиз бронза медали учун кечган баҳсларнинг дастлабкисида ирландиялик Меган Флетчерга ютқазиб қўйди ва еттинчи ўрин билан кифояланди. Матниязова медалсиз қолган бўлса-да, Токио-2020 Олимпиадаси учун муҳим ҳисобланган 182 рейтинг очкосини қўлга киритди. Ғиёсжон Бобоев эса 112 очкога эга бўлди. Шерали Жўраев, Шаҳрам Аҳадов Гран-придан 70 очко ишлаб олишди.

Шу тариқа, ўзбекистонлик спортчиларнинг тунирдаги иштироки якунланди. Афсуски, дзюдочиларимиз мусобақани медалсиз якунлашди. Исроил Гран-приси жорий йил ҳисобидан илк халқаро турнир бўлгани учун ҳам дзюдочиларимизнинг натижалари мураббийларимиз кутганчалик бўлмади. 

Ўйлаймизки, мавсумнинг илк иштирокидан тегишли хулосалар чиқарилади. Мураббийлар кенгаши ҳар бир баҳсни муҳокама қилади. Бу эса кейинги халқаро мусобақаларда натижаларнинг ижобий томонга ўзгаришига замин яратади.