Исроил Мадримов Соро билан жанг, кейинги режалари ва оила қураётгани ҳақида гапирди

Бугун тонгда боксчимиз Тошкент халқаро аэропортида тантанали кутиб олинди. Шундан сўнг, Исроил Мадримов Сорога қарши жанг ва келгуси режалар ҳақида фикрларини билдириб ўтди:

"Дуранг натижа бўлишини ҳеч ким кутмаганди, бунақа ҳолат спортчиларимиз орасида ҳам, ўзимни фаолиятимда ҳам биринчи маротаба кузатилмоқда. Профессионал боксда мана шундай қоида бор ва бундай ҳолат техник дуранг дея ҳисобланади.

Аммо мен хурсандман. Нега? Сабаби биринчи жангимдан кўра мен анча тажриба йиғиб олган эдим ва икки раунд тушган бўлсам ҳам ўзимга ишонч билан ҳаракат қилдим. Худо хоҳласа, кутиб қоламиз WBA йўналишида чемпионлик жангига имконият беришса, яхши бўларди. 

Бу жангга тўрт ой давомида тайёргарлик кўргандик ва 12 раундлик жангга тайёр эдим. Иккинчи раунддан кейин имконият мен тарафда эди, шунинг учун кейинги ёки ундан кейинги раундда жанг якунланиши ҳам мумкин эди. Худо хоҳласа, қарорни кутамиз ва тажрибамни ошириб, чемпионлик учун ҳаракат қиламан. 

Соро билан кейинги жанг эҳтимоли ҳақида...

"Энди бу нарсани аниқ айта олмайман. Чунки бу WBA йўналишидагиларга боғлиқ, лекин иложи борича чемпионлик жангига ҳаракат қилсак керак деб ўйлайман. Сабаби бу нарсани чўзиб бўлмайди. Бошқа йўналишларда талабгорларнинг борлиги туфайли, оралиқ вақт жуда узоқ бўлиб кетади деб биламан".

Шунингдек, Исроил Мадримов оила қураётганини тасдиқлади:

"ИншаAллаҳ яқин кунларда тўй ҳаракатларини бошлаймиз. Уйланиш вақти келди, умрни қолган қисмини жуфти ҳалолим билан чиройли давом эттириш ниятидаман", - деди Мадримов. 

 Olamsportcom таҳририяти Исроил Мадримовга бахт тилаб қолади.