Исроил Мадримов Хоразм спорт бошқармасида бўлди

Айни дамда, у  ҳаваскорлар ўртасида Осиё чемпионати ва Осиё ўйинлари олтин медали соҳиби, қатор халқаро турнирлар ғолиби ва совриндори, қолаверса, профессионал бокс оламининг WBA inter-continental камари эгаси ҳисобланади. 

Эндиликда, боксчимиз IBF ва WBA талқинлари бўйича жаҳон чемпиони Жейсон Росариога қарши жангга ҳозирлик кўрмоқда. Бунинг баробарида, Япониянинг Токио шаҳрида бўлиб ўтадиган ёзги Олимпиада ўйинлари лицензиясини қўлга киритиш иштиёқида мусобақаларга қизғин тайёрланяпти.

Исроил Мадримов карантин даврида уйида бўлиб турганди. Фурсатдан фойдаланиб, у бир неча кун аввал ўзининг биринчи тренери Баҳром Қурёзов билан Хоразм вилояти жисмоний тарбия ва спорт бошқармасига ташриф буюриб, у ерда бошқарма бошлиғи вазифасини вақтинча бажарувчи Артик Палванов билан учрашди.

Ўзаро суҳбат чоғида профессионал боксчимиз уй шароитида тренерлари томонидан берилаётган махсус дастур асосида якка тартибда ўтказаётган машғулотлар жараёни, келгуси режалари ва мақсадлари ҳақида  сўзлаб берди. 

Ўз навбатида воҳа спорти раҳбари  таниқли боксчимизга келгусида ҳам ўзбек спорти  довруғини янада баланд кўтаришига тилак билдирди.

Икром  ХУДОЙБЕРГАНОВ.