Исроил Мадримовнинг 2024 йили!

Хоразмлик чарм қўлқоп устамиз март ойида биринчи ўрта вазн тоифасидаги WBA чемпионлик камарини қўлга киритди. Мадримов рейтингнинг иккинчи поғонасида бораётган россиялик Магомед Курбанов (25-1, 13 КО)ни бешинчи раундда техник нокаутга учратиб, рақибига фаолиятидаги илк мағлубиятни тақдим этди.

Апрель ойининг охирларида Исроил Мадримовнинг учта вазнда жаҳон чемпиони, вазн тоифасидан қатъи назар дунёнинг энг кучли боксчиларидан бири Теренс Кроуфорд (40-0, 31 КО)га қарши жанги эълон қилинди.

4 август куни Лос-Анжелесда бўлиб ўтган 12 раундлик жангда тажрибали Кроуфорд ҳакамлар қарорига (116-112, 115-113, 115-113) кўра баҳсли ғалабани қўлга киритди. Кўпчилик боксчилар ва экспертларнинг фикрича, жангда Мадримов ғалаба қозонган эди. 

Исроил Мадримовнинг мураббийлари Теренсга қарши ўтказилган жангдан қониқиш ҳосил қилишди. Фаолиятидаги илк мағлубиятга қарамай, боксчимиз The Ring рейтингида учинчи поғонадан иккинчи ўринга кўтарилиб олди.

Эслатиб ўтамиз, Исроил Мадримов навбатдаги жангини 22 февраль куни Ар-Риёд (Саудия Арабистони) шаҳрида ташкил этиладиган проф бокс оқшоми доирасида супер яримўрта вазн тоифасида WBC Interim камари соҳиби, америкалик Вержил Ортисга қарши ўтказади.