Истомин, Каримов, Исмоилов, Файзиев “Астана Челленжер”ида

Astana Challenger “Capital Cup” турнирининг асосий тўр баҳсларида бир йўла тўрт нафар теннисчимиз ҳам ўз имкониятини синовдан ўтказади. Мамлакатимизнинг биринчи ракеткаси Денис Истомин ушбу мусобақада иккинчи рақам остида ҳаракат қилади.

Ҳамюртимиз эртага илк давра учрашувида чехиялик Робин Штанекка қарши кортга чиқади. Истомин жуфтлик баҳсларида россиялик Михаил Елгин билан тандем ҳосил қилган.

Истеъдодли теннисчимиз Жўрабек Каримов асосий тўр баҳсларига имтиёзли йўлланма асосида қўйилган бўлиб, биринчи босқичда германиялик Даниэль Масурга қарши баҳс олиб боради.

Саралаш баҳслари орқали асосий тўрга йўлланма олган Темур Исмоилов қозоғистонлик Тимур Хабибулинни синовдан ўтказади. Терма жамоамиз аъзоси Санжар Файзиев эса ҳиндистонлик Саси Кумар Мукунд билан тўқнаш келади.