Жаҳон чемпионати. Ҳумоюн илк бор очко йўқотди, гроссмейстеримизда ғалаба

Нуфузли мусобақада Ўзбекистон терма жамоасининг бир неча ёш тоифасидаги шахматчилари ҳам иштирок этишяпти. Улардан биргина Ҳумоюн Бекмуродов ғолибона юришини давом эттираётган эди. Кеча ёш шахматчимиз илк бор очко йўқотди. Ўтказилган 8-турда у туркиялик Уйгар Дуручай билан муросага келди ва ўз очколарини 7,5тага етказиб олди. 

Ёш гроссмейстеримиз Жавоҳир Синдаров ўтган турдаги кутилмаган мағлубиятдан сўнг яна ғалаба қозонди. Жавоҳир қозоғистонлик Айтуар Жукеновни таслим этди. Шахматчиларимиз орасида энг юқори рейтинг очкосига эга Нодирбек Ёқуббоев эса Шри-Ланка шахматчисини мағлубиятга учратиб, очколарини 7,5тага етказди. 

Афруза Ҳамдамова 8-турда яна мағлубият аламини тотиб кўрди. У қора доналарда ўйнаб, грузиялик Анастасия Киртадзега ютқазиб қўйди. Қизларимиздан Умида Омонова туркиялик Гулшан Кайисни, Зайнура Абророва Шри-ланкалик Анакши Вираратнени мағлубиятга учратди. 

17 ёшлилар турнирида қатнашаётган Шамсиддин Воҳидов жамоадаоши Али Қосимовдан, Баҳром Баҳриллаев қозоғистонлик Мирас Ассиловдан устун келди. Акбар Аллаберганов қора доналарда ҳаракат қилишига қарамай, озарбайжонлик Юсиф Бабаевни енгди.