Жаҳон чемпионати. Ҳумоюнда кетма-кет еттинчи ғалаба, гроссмейстеримиз ютқазди

Нуфузли мусобақада Ўзбекистон терма жамоасининг бир неча ёш тоифасидаги шахматчилари ҳам иштирок этишяпти. Улардан биргина Ҳумоюн Бекмуродов бугунгача ўтказилган 7 та партиянинг барчасида ғалаба қозонишга муваффақ бўлган. 

Ҳумоюн кеча ўтказилган 7-тур учрашувида қора доналарда ҳаракат қилишига қарамай, қозоғистонлик шахматчи Динмуҳаммад Тулендиновни мағлубиятга учратди. Ёш гроссмейстеримиз Жавоҳир Синдаров эса кутилмаганда озарбайжонлик Угхур Иляслига имкониятни бой бериб қўйди. 

Шахматчиларимиз орасида энг юқори рейтинг очкосига эга Нодирбек Ёқуббоев қора доналарда ўйнаб, туркиялик Алп Кансунни енгди. Афруза Ҳамдамова 7-турда мағлубият аламини тотиб кўрди. У оқ доналарда ўйнаса-да, якунда мўғулистонлик рақибасига ютқазиб қўйди. 

17 ёшлилар турнирида қатнашаётган Шамсиддин Воҳидов озарбайжонлик Ҳазар Бабазададан устун келди. Баҳром Баҳриллаев Шри-Ланка шахматчиси билан дуранг ўйнади. Акбар Аллаберганов мезбон шахматчидан устун эканлигини амалда исботлади. 

Али Қосимов бу турда туркиялик Серхан Ўздемирни таслим этди. Умида Омонова мўғулистонлик Давааку Мункжулга имкониятни бой берди. Зайнура Абророва бу турда ғалаба нашидасини сурди. У қирғизистонлик Алия Шарабиддиновани мағлуб этди.