Жаҳон чемпионати. Ихтиёр Наврўзов ва Магомед Ибрагимов гиламга чиқди

Кеча мусобақанинг навбатдаги кунги беллашувларида икки ҳамюртимиз медаллар учун гиламга чиқди. Афсуски, уларнинг ҳар иккиси ҳам чорак финалда мағлубиятга учраб, совринли ўринларсиз қолишди. 

-70 кг вазн тоифасида юртимиз спорт шарафини ҳимоя қилган Рио Олимпиадаси совриндори Ихтиёр Наврўзов саралашнинг биринчи босқичида япониялик Кейсуке Отагурони 12:1 ҳисобида енгди. Нимчорак финалда ҳиндистонлик Рана Панкаждан 10:0 ҳисобида устун келди. Чорак финалда эса грузиялик Зураби Якобишвилига 1:5 ҳисобида ютқазиб, жаҳон чемпионатидаги иштирокини якунлади.

-97 кг вазн тоифасида эса Ўзбекистон номидан Рио Олимпиадаси ҳамда Осиё ўйинлари совриндори, Осиё чемпиони Магомед Ибрагимов иштирок этди. Магомед илк даврада туркиялик Фатих Ясарлини 6:3, 1/8 финалда беларуслик Александр Гуштинни 11:7 ҳисобида енгди. Ярим финал остонасида эса россиялик Абдулрашид Садуллаевга 0:10 ҳисобида имкониятни бой берди. 

Эслатиб ўтамиз, жаҳон чемпионатининг биринчи кунги баҳсларида -74 кг вазн тоифасида гиламга чиққан ҳамюртимиз Осиё ўйинлари ғолиби Бекзод Абдураҳмонов терма жамоамизга бронза медалини тақдим этганди.