Жаҳон чемпионати. Очко йўқотмаган биргина Ҳумоюн қолди

Нуфузли мусобақада иштирок этаётган Ўзбекистон терма жамоасининг 4 нафар аъзоси мағлубиятсиз юришини давом эттирмоқда. Лекин улардан биргина Ҳумоюн Бекмуродов бугунгача ўтказилган 5 та партиянинг барчасида ғалаба нашидасини сурган. 

Ёш гроссмейстеримиз Жавоҳир Синдаров, шунингдек, Нодирбек Ёқуббоев ҳамда Афруза Ҳамдамова кеча ўтказилган 5-турда дуранг ўйнаб, илк бор очко йўқотишди. Ҳумоюн эса қора доналарда ўйнашига қарамай, ўзи сингари 4 та партиянинг барчасида зафар қучган қозоғистонлик Эдгар Мамедовни мағлуб эта олди. 

Ўн беш ёшли Синдаров 5-турда туркиялик Экин Ўзинир, Ёқуббоев яна бир мезбон шахматчи Каган Айдинчелеби, Ҳамдамова эса қозоғистонлик Айша Закирова билан дуранг ўйнади. 17 ёшлилар турнирида қатнашаётган Шамсиддин Воҳидов қозоғистонлик Абдилмансур Абдихайирни енгди. 

Акбар Аллаберганов мўғулистонлик Мунхбат Очирбатдан устун келди. Баҳром Баҳриллаев ҳиндистонлик Рафаэль Шарон билан муросага келди. Али Қосимов, Зайнура Абророва ва Умида Омоновалар эса рақибаларига имкониятни бой бериб қўйишди.