Жаҳон чемпионати совриндори муносиб тақдирланди ФОТО

Мусобақада муваффақиятли иштирок этган полвонларимиз 1 та олтин, 5 та кумуш, 6 та бронза, жами 12 та медални қўлга киритиб, қирқдан ортиқ давлатдан иштирок этган спортчилар орасида умумжамоа ҳисобида кучли бешликдан ўрин эгаллашганди. 

Ушбу жаҳон чемпионатида Қашқадарё вилояти Чироқчи туман Халқобод қишлоғида яшовчи, тумандаги 1-сонли болалар-ўсмирлар спорт мактабининг белбоғли кураш бўйича тўгарак аъзоси Муниса Алишерова ҳам -52 кг. вазн тоифасида терма жамоа таркибида иштирок этиб, бронза медалини қўлга киритган эди. 

Чироқчи туман ҳокимлиги, туман жисмоний тарбия ва спорт бўлими ташаббуси билан 1-сонли болалар-ўсмирлар спорт мактабида бронза медали соҳибасини тақдирлаш маросми бўлиб ўтди. 

Кенг спорт жамоатчилиги, спортчи-ўқувчилар, Мунисанинг яқинлари  иштирокида ўтган тақдирлаш маросимда туман ҳокими Хуррам Жўраев совриндор спортчимизни қутлар экан, спортга қаратилаётган эътибор туфайли ёшларимизнинг халқаро спорт ареналарида муносиб натижаларга эришаётгани, миллий спорт туримиз бўлган белбоғли кураш ҳам вилоятда, хусусан, Чироқчи туманида кенг оммалашиб бораётгани ва бунинг натижасида илк бор белбоғли кураш бўйича вилоят миқёсида жаҳон чемпионати медалини айнан чироқчилик полвон қиз томонидан қўлга киритилганини фахр билан гапириб ўтди. 

Шунингдек, туман ҳокими ушбу спорт турини, қолаверса жисмоний тарбия ва спортнинг янада оммавийлигини таъминлаш борасида кенг кўламли ишлар амалга оширилишини таъкидлади. 

Шундан сўнг, туман ҳокимлиги, вилоят белбоғли кураш федерацияси, вилоят жисмоний тарбия ва бошқармаси ҳамда ушбу бошқарманинг туман бўлими, 1-БЎСМ томонидан Муниса Алишеровага қимматбаҳо эсдалик совғалари топширилди. 

Фарҳод ЖУМАНОВ, вилоят белбоғли кураш федерацияси раиси, белбоғли кураш бўйича халқаро тоифадаги ҳакам:

- Ўзим мазкур жаҳон чемпионатида ҳакам сифатида иштирок этиб, гувоҳи бўлдимки, Муниса қизимизга кучли учликдан жой олиш осон кечгани йўқ. Иродаси мустаҳкам, қобилияти борлиги боис, бронза медалига эришди. Албатта, уни шу кураш турига ошно этган, истеъдоди шаклланишада, катта спорт сари етаклашда тажрибали  устози Баҳриддин Ярматовга яқинлари номидан, белбоғли кураш федерацияси номидан ташаккур билдирамиз. Бугун вилоятимизда юзлаб болалар белбоғли кураш бўйича машғулотларда иштирок этишмоқда. Ўйлайманки, кейинги халқаро мусобақаларда натижаларимиз бундан-да аъло бўлади, чунки бизда шароит ҳам, имкониятлар ҳам етарли.

Илҳом РАҲМОНОВ тайёрлади, ўз мухбиримиз