Жаҳон чемпионатида иштирок этган ҳар икки дзюдочимиз совриндор бўлди

Дунё биринчилигида 4 қитъанинг 49 давлатидан жами 405 (223 ўсмир, 182 қиз) нафар дзюдочи медаллар йўлида татамига чиқяпти. Ушбу жаҳон чемпионатида юртимиз шарафини Тоҳир Файзиев мураббийлигидаги истеъдодли дзюдочиларимиздан Иноят Телманов (-66 кг) ва Иномжон Баҳодиров (-73 кг) ҳимоя қилди.

Иккинчи кунги беллашувларда Иноят Телманов жаҳон чемпионатининг бронза медалини қўлга киритган эди. Бизнинг вақт билан бугун тонг саҳарда Иномжон Баҳодиров ҳам совриндорлар сафидан жой олди. У бронза медали йўлидаги ўтиш баҳсида бразилиялик Силас Костани мағлуб этди. Бронза медали учун кечган беллашувда эса литвалик Рака Норбертасдан устун келди. 

Шу тариқа, ҳар икки истеъдодли дзюдочимиз океан ортидан Ўзбекистонга жаҳон чемпионатининг бронза медали билан қайтадиган бўлди. Албатта, ўсмирларимизнинг бу икки медали Мустақиллигимизнинг 33 йиллигига муносиб туҳфа бўлди.