Жаҳон чемпионатида кучли бешликдан жой олдик!

Кечаги дастурдан жамоавий беллашувлар ўрин олган бўлиб, унда Ўзбекистон терма жамоаси ҳам медаллар учун татамига чиқди. Афсуски, дзюдочиларимиз аввалига Бразилия, кейин эса Грузия терма жамоасига кичик ҳисобда имкониятни бой бериб қўйишди. 

Яккаликдаги баҳсларда эса Ўзбекистон терма жамоаси 1 та олтин, 1 та кумуш, 2 та бронза медали билан 5 қитъанинг 63 давлати орасида 5-ўринни эгаллади. Биздан юқорида турган Франция, Туркия ва Италия ҳам биз каби 1 та олтин медалга сазовор бўлган. Фақат кумуш медаллар уларда биттага кўпроқ.  

Кутилганидек, Япония терма жамоаси катта фарқ билан медаллар жамғариш бўйича биринчи ўринни банд этди. Дзюдо ватани вакиллари 6 та олтин, 2 та кумуш, 2 та бронза медалини Кунчиқар юртга олиб кетадиган бўлишди. Битта олтин, 2 та кумуш, 3 та бронза медалини ўз ҳисобига қўшиб қўйган Франция иккинчи бўлди. Туркия эса 1 та олтин, 2 та кумуш, 2 та бронза медали билан кучли учликка якун ясади.