Жаҳон чемпионатида полвонларимиз ҳозирча 12 та медаль қўлга киритишди + ФОТО

Кеча старт олган ушбу жаҳон чемпионатида 38 давлатдан 250 нафарга яқин полвонлар ғолиблик учун кураш олиб боришмоқда. Қувонарлиси, Ўзбекистон белбоғли кураш федерацияси раиси Равшан Дастиров бошчилигидаги 18 нафар терма жамоамиз аъзолари (бош мураббий Аъзамжон Шокиржонов) ҳам мазкур жаҳон чемпионатида муносиб иштирок этишмоқда.

Халқаро тоифадаги ҳакамларимиздан Бекберган Болтаев ҳамда Неъматулло Тўйчиевлар эса ушбу жаҳон чемпионатида ҳакамлик вазифасини ўташмоқда. Жаҳон чемпионати регламентига кўра, кеча белбоғли курашнинг эркин йўналиши бўйича ғолиб ва совриндорлар номи аниқланди.

Муросасиз ва шиддатли тарзда ўтган беллашувларда ҳамюртларимиз 2 та олтин, 2 та кумуш ва 8 та бронза медалларига эга чиқиб, умумжамоа ҳисобида кучли учликдан жой олишга муваффақ бўлишди. Ғолиб спортчиларимиз шарафига мадҳиямиз жаҳон аренасида баралла янгради, Ватанимиз байроғи сарбаланд кўтарилди.

Қуйида жаҳон чемпионатининг ғолиб ва совриндор курашчилари билан танишамиз:

Олтин медаль соҳиблари:

-100 кг. Нодирбек Аҳаджонов (Тошкент ш.)

-66 кг. Мафтунабону Маҳмудова (Андижон)

Кумуш медаль соҳиблари:

-57 кг. Ҳусанбой Носиров (Андижон)

-90 кг.Жасурбек Исроилов (Андижон)

Бронза медаль соҳиблари:

-82 кг. Ҳусниддин Рўзиев (Андижон)

+100 кг. Аъзамжон Анваржонов (Андижон)

-62 кг. Достонбек Обиджонов (Наманган)

-68 кг. Муроджон Хамидов (Наманган)

-75 кг. Оғабек Аматбоев (Хоразм)

-52 кг. Мухлисахон Сотволдиева (Фарғона)

-57 кг. Манзураой Мўйдинова (Фарғона)

-76 кг. Зиёдахон Эргашева (Фарғона)

Жаҳон чемпионатининг иккинчи куни яъни бугун белбоғли курашнинг классик йўналишида беллашувлар бўлиб ўтади. Полвонларимизга ушбу йўналишда ҳам омад тилаймиз.  

Илҳом РАҲМОНОВ тайёрлади