Жаҳон чемпионатида яна бир медалга эга чиқдик, умумжамоа ҳисобида бешинчи бўлдик!

Қувонарлиси, мусобақанинг сўнгги куни ҳам терма жамоамиз учун муваффақиятли кечди. Сўнгги кунги баҳсларда стартга чиққан Ўзбекистон давлат жисмоний тарбия ва спорт университети талабалари Дилноза Раҳматова ҳамда Нилуфар Зокировалар жуфтлиги каноэда эшкак эшиш бўйича 500 метр масофага ўтказилган пойгада кумуш медалга сазовор бўлди.

Қизларимиз белгиланган масофани россиялик спортчилар Ксения Курах ва Дарья Харшенко жуфтлигидан кейин босиб ўтишди. Раҳматова/Зокирова жуфтлиги мусобақа ғолибларидан атиги 0,778 сонияга ортда қолди. Кучлилар учлигини Венгрия терма жамоаси аъзолари София Кисбан ва Гиада Брагато жуфтлиги якунлаб берди.

Шу тариқа Ўзбекистон терма жамоаси аъзолари 23 ёшгача бўлган спортчилар ўртасидаги жаҳон чемпионатида иккита олтин ва битта кумуш медалга сазовор бўлди. Бу эса мамлакатимиз спорт делегациясига жаҳон чемпионатини умумжамоа ҳисобида 5-ўринда якунлаш имконини тақдим этди.