Жаҳон чемпионатларида шоҳсупага кўтарилган ёш спортчиларимиз пул мукофот билан тақдирланишди

Ўзбекистон Республикаси Президентининг 2023 йил 7 апрелдаги «Маъмурий ислоҳотлар доирасида ёшлар сиёсати ва спорт соҳасида давлат бошқарувини самарали ташкил қилиш чора-тадбирлари тўғрисида»ги 114-сон Қарорига биноан ҳар йили Олимпия ва Паралимпия спорт турлари бўйича ўсмирлар, ёшлар ва катталар ўртасидаги жаҳон чемпионатларида совриндор бўлган спортчилар ҳамда уларни тайёрлаган мураббийлар бир марталик пул мукофотлари билан тақдирланишади. 

Тадбирда Ўзбекистон Респубилкаси Спорт вазирининг ўринбосари Шаҳрулло Маҳмудов, МОҚ Бош котиби Ойбек Касимов, Спорт фахрийлари кенгаши раиси Баҳодир Махситов, ёш спортчиларимиз ҳамда уларнинг устозлари иштирок этишди. Маросим аввалида сўз олган расмийлар ўзбек спортининг келажаги бўлган ёшларимизни эришган муваффақиятлари билан қутлаб, уларга катталар ўртасидаги дунё биринчиликлари ва Олимпия ўйинларида ҳам шоҳсупага кўтарилишларини тилашди.

Шундан сўнг жаҳон чемпионатларида шоҳсупага кўтарилган 45 нафар спортчи ва уларнинг мураббийларига пул мукофотларининг сертификатлари тақдим этилди. Президент қарорига мувофиқ, олтин, кумуш ва бронза медали соҳиблари мос равишда 3500, 1750 ва 875, уларни тайёрлаган тренерлар эса 2000, 1000 ва 500 АҚШ доллари миқдорида тақдирланишди.