28 авг 11:27
Янгиликлар

Дзюдо

Жаҳон чемпионатларидаги тарих янгиланди, умумжамоа ҳисобида кучли тўртликдамиз!

Босния ва Герцеговиниянинг Сараево шаҳри мезбонлигида ўтаётган дзюдо бўйича кадетлар ўртасидаги жаҳон чемпионатининг яккалик баҳслари якунига етди.

Қувонарлиси, Ўзбекистон терма жамоаси жаҳон биринчилигида 1 та олтин, 4 та кумуш, 3 та бронза медали билан умумжамоа ҳисобида дунёнинг 60 давлати орасида 4-ўринни эгаллади. Агар кеча Аббос Шермаҳматов финалда венгриялик рақиби Петер Кендересини мағлуб этганида, жаҳон чемпионатини 2-ўринда якунлаган бўлардик.

Кечаги кун қаҳрамонлари орасида -70 кг вазн тоифасида юртимиз шарафини ҳимоя қилган Барчиной Қодирова италиялик Серена Ондеини таслим этиб, жаҳон чемпионатининг олтин медалини қўлга киритди. Бу билан у Диёра Келдиёровадан сўнг кадетлар ўртасида жаҳон чемпиони бўлган иккинчи ўзбекистонлик дзюдочимизга айланди.