Жаҳон рекордчиси ҳамда терма жамоа аъзолари тантанали кутиб олинди

Самолёт йўловчилари сафидан оғир атлетика бўйича яқингинада Таиланднинг Бангкок шаҳрида бўлиб ўтган жаҳон чемпионатидан совриндор бўлиб қайтаётган Ўзбекистон терма жамоаси аъзолари ҳам ўрин олишганди.

Эслатиб ўтамиз, ушбу жаҳон чемпионатида вакилларимиз учта медалга сазовор бўлишди. Жумладан, эркаклар ўртасида -67 кг вазн тоифасида Адҳамжон Эргашев силтаб кўтариш машқида кичик бронза, -109 кг вазнда эса Акбаржон Жўраев ҳам силтаб кўтариш машқида кичик кумуш медални қўлга киритди. 

Аёллар ўртасида -55 кг вазн тоифасида супачага кўтарилган терма жамоамизнинг умидли спортчиларидан бири Муаттар Набиева ҳам якунда совриндорга айланди. У силтаб кўтариш машқларида кичик бронза медалига эга чиқди. Дарвоқе, Акбаржон Жўраев томонидан қайд этилган натижа ёшлар ўртасида жаҳон рекорди сифатида тарихга кирди.

Таъкидлаш керак, жаҳон чемпионати баҳсларида Ўзбекистон ўзининг мустақиллик йилларидаги энг ёш таркиби билан иштирок этган бўлишига қарамай ватанимизга учта медаль билан қайтишди. Бундан англаш мумкинки, Ўзбекистон оғир атлетикасининг эртаси ишончли қўлларда.

Бугун Тошкент халқаро аэропортига оғир атлетикачиларимизни кутиб олиш учун Жисмоний тарбия ва спорт вазирлиги ҳамда Миллий олимпия қўмитасининг мутасаддилари, Ўзбекистон касаба уюшмалари федерацияси Марказий Кенгаши ходимлари, Ўзбекистон оғир атлетика федерацияси вакиллари ҳамда спортчиларнинг оила аъзолари, яқинлари ва ОАВ ходимлари ҳозир бўлишди.