Жаҳон термасида ўйнаган Сергей Лебедев "Нефтчи"га қайтди

8-тур олдидан Фарғонанинг "Истиқлол" жамоаси Ўзбекистон чемпионатини тарк этганлиги сабабли, жамоа аъзоларига бошқа клублар билан шартнома имзолаб, фаолиятларини давом эттириш ҳуқуқи тақдим этилган. 

Шунга мувофиқ, "Истиқлол" жамоасининг икки нафар футболчиси Рустам Абдуҳамидов ҳамда Умар Адҳамзода "Нефтчи" жамоаси билан шартномани расмийлаштирди. Ундан олдин эса "Навбаҳор" сафида тўп тепган Анваржон Хожимирзаев ва Қирғизистонда фаолият юритиб келаётган Сирожиддин Аллаев "Нефтчи" билан шартнома имзолаганди.

Карантин туфайли юзага келган танаффусдан сўнг "Нефтчи" сафига "Қўқон-1912" клубида ижара асосида ўйнаган ҳимоячи Шодиёр Хожиматов ҳамда фарғоналиклар сафида илгари ўйнаган Павел Смоляченко қўшилди. Ундан ташқари "Истиқлол" жамоасида бош мураббий вазифасида ишлаб келган Сергей Лебедев ҳам қадрдон жамоасига қайтди ва мураббийлик фаолиятини "Нефтчи"да давом эттиришига келишиб олинди.

Маълумот учун, Сергей Лебедов 1992-1999, 2002-2004, 2006 йилларда "Нефтчи"да тўп тепган. Мураббий сифатида 2016-2017 йилларда  "Нефтчи"да ёрдамчи мураббий сифатида фаолият олиб борган. 2018 йилдан буён эса "Истиқлол" жамоасида ишлаб келаётганди.