Жакарта-2018’дан омадлироқ старт бўлдими? 5 йил олдинги ва ҳозирги Осиё ўйинлари стартини таққослаймиз

Хабарингиз бор, Хитойнинг Ханчжоу шаҳрида ХIX Осиё ўйинлари старт олди. Ўзбекистон делегацияси ортда қолган икки кун ичида 14 та медаль қўлга киритди. Делегациямиз  4 та олтин, 4 та кумуш ва 6 та бронза медаллари билан умумжамоа ҳисобида 4-ўринни эгаллаб турибди.  

Хўш, бундан 5 йил олдин Индонезиянинг Жакарта ва Палембанг шаҳарларида бўлиб ўтган Осиё ўйинларида ўзбекистонлик спортчилар дастлабки икки кунда нечта медаль қўлга киритган эди?

2018 йилда мусобақанинг илк кунида эркин кураш спорт турининг -65 кг вазн тоифасида Сирожиддин Ҳасанов ва  -97 кгда Магомед Ибрагимовлар бронза медалини қўлга киритган бўлса, -74 кг вазнда Бекзод Абдураҳмонов олтин медални ўзиники қилган эди. 

Иккинчи кунги баҳсларда эса ушунинг таулу йўналиши бўйича Дарья Латишева  кумуш медалга эга чиққан. Таэквондонинг -67 кг вазн тоифасида юртимиз шарафини ҳимоя қилган Нигора Турсунқулова ярим финалда жанубий кореялик рақибга ютқазиб,  бронза медалига сазовор бўлган. Яна таэквондо спорти бўйича Ниёз Пўлатов финалгача етиб бориб, ҳал қилувчи баҳсда жанубий кореялик рақибига мағлуб бўлган ва кумуш медаль соҳибига айланганди. Эркин курашчимиз Давит Модзманашвили ҳиндистонлик рақибини мағлубиятга учратиб, турнирнинг бронза медалини қўлга киритган эди. Индонезиядаги Осиё ўйинларининг дастлабки икки кунида Ўзбекистон делегацияси вакиллари умумий ҳисобда 7 медаль қўлга киритган. 

Булардан биттаси олтин, 2 таси кумуш ва 4 таси бронза медалидир. Натижалардан кўришингиз мумкинки, бу йилги Осиё ўйинларидаги старт ўтган ўйинларга нисбатан муваффақиятлироқ бошланди. Бўлажак баҳсларда юртдошларимизга зафарлар тилаб қоламиз.

Жакарта-2018 (дастлабки икки кун):

1 та олтин, 2 та кумуш, 4 та бронза

Ханчжоу-2022 (дастлабки икки кун):

4 та олтин, 4 та кумуш, 6 та бронза

Хабиб Жўрабоев тайёрлади