Жамоавий Ўзбeкистон кубоги Бухорода ўтказилади

10, 12, 14 ҳамда 16 ёшгача бўлган ўсмирлардан иборат ҳудудий терма жамоалар ўртасида ўтказиладиган ушбу мусобақада Қорақалпоғистон Республикаси, барча вилоятлар ва Тошкент шаҳрининг энг иқтидорли ёш шахматчиларидан иборат жамоалар ғолиблик учун дона суришади.

Жами 7 турдан иборат турнир швейцарча тартибда ўтказилади. Мусобақада электрон соатлардан фойдаланилади ва ҳар бир иштирокчига ўйин охирига қадар 90 дақиқадан вақт берилади.

Мусобақага Бухоро тумани “Работиқалмоқ” МФЙ ҳудудида жойлашган “Лаззат” ресторани мезбонлик қилади. Жамоавий Ўзбекистон кубогида ҳар бир жамоа учун бадал миқдори 500 000 сўмни ташкил қилади.

Ўзбекистон шахмат федерацияси матбуот хизматининг хабар қилишича, мукофот жамғармаси 12 000 000 сўмни ташкил қиладиган Ўзбекистон кубогида ғолиб чиққан жамоа 4 000 000 сўм миқдоридаги пул мукофоти билан тақдирланади. 2-ўрин учун 3 200 000 сўм ҳамда 3-ўринга сазовор бўлган жамоа эса 2 800 000 сўм миқдоридаги мукофотни қўлга киритади.