Жанг олдидан: Порье ва Гетжига “ўйинчоқ” камар керакми?!

Дастин Порье ҳамда Жастин Гетжи расмий камар учун эмас, балки унинг нусхаси бўлмиш BMF камари учун жанг ўтказади. UFC томонидан ўйлаб топилган ушбу камар дастлаб Хорхе Масвидаль ҳамда Нейт Диаз жанги ғолибига тақдим этилган. Бу қарама-қаршиликда Масвидаль ғалаба қозониб, якунда норасмий камарга эга чиққан илк жангчига айланганди. 

“Масвидал “нафақага чиқди” ва биз камарни қайтариб олдик. Қанчадан-қанча йигитлар бу камар учун курашишни исташини яхши биласиз. Бу ном кўпчиликка ёқади, қизиқарли ва ғайриоддий, шу боис биз ушбу унвон учун яна жанг ташкил этамиз. Биринчи марта бўлгани каби бу сафар ҳам муносиб номзодлар дуэлига гувоҳ бўласиз. Шунинг учун Порье ҳамда Гетжиларни танлаб олдик”, дейди Дана Уайт MMA News’га берган интервьюсида. 

Умуман олганда бундай камарнинг жорий этилиши кўпчиликни ҳайрон қолдирганди. Бу қандай унвон, у учун ким курашади, у нима беради?, деган саволлар пайдо бўла бошлаганди. Аслида бу PR ва рекламадан бошқа нарса эмас. Бу турдаги камар учун дастлаб Масвидаль ва Диаз курашган бўлса, мана орадан 4 йил ўтиб, Порье ва Гетжилар жанг қилади. Қизиқ, ортда қолган 4 йилда нега ҳеч ким бу камар учун жанг қилмади? Дастин ҳамда Жастин Ислам билан чемпионлик жанги учун барча нарсага тайёр бўлган жангчилар ҳисобланди. Уларни қандайдир “ўйинчоқ” камар билан овутиш қанчалик тўғри?! 

Порье ва Гетжи - сўзсиз ажойиб жангчилар. Улар 2018 йилда бўлган дастлабки тўқнашувдагидек супер жанг кўрсатиб беришларига шубҳа йўқ. Ўшанда жангнинг 4-раундида Дастин ғалаба қозониб кетганди. “Агар ушбу жангдан кейин камар белимда бўлса, мен чемпионлар каби айланиб юрмайман, бироқ бу қизиқ”, дейди Дастин Порье. 

“Масвидаль ва Диаз камар учун курашганларида мен буни аҳмоқлик деб ўйлаганман. Ҳали ҳам шу фикримда собитман. Аммо UFC жангчиларга трансляциялардан пул ишлаш имконини берди. Нима бўлган тақдирда ҳам бу камар ва ҳар қандай камар қоғозда чемпионлик саналади. UFC назарида сиз чемпион бўласиз. Қолаверса, бунда жангчиларга ҳар хил гонорар тўланади”, дея ўз фикрларини билдириб ўтган Жастин Гетжи. 

Маълум бўлишича, Дана Уайт BMF камарининг ортида чемпионлик жанги учун навбат борлиги ҳақида бироз айёрлик қилмоқда. Дастин ва Жастин жанги ғолиби катта эҳтимол билан вазн чемпиони билан рўбарў келади. Айни пайтда бизни “ўйинчоқ” камарнинг янги соҳиби ҳамда чемпионлик учун асосий номзод ким бўлиши кутиб турибди.

championat.com сайти асосида Хабиб Жўрабоев тайёрлади