Жастин Гэтжи Махачевга қарши жангдан бош тортди

Жастин келаётган якшанба тонгида ўзига тегишли BMF камарини Макс Холлоуэйдан ҳимоя қилади. Гэтжи Максни мағлубиятга учратган ҳолатда июнь ойида чемпионлик камарини ҳимоя қиладиган Ислам Махачевга "вызов" ташламаслигини айтмоқда. Унинг фикрича, россиялик чемпионнинг кейинги рақиби Чарльз Оливейра - Арман Царукян жанги ғолиби бўлиши шарт. Айнан шу баҳс ташкилот томонидан даъвогарлар жанги деб эълон қилинган. 

"Оливейра-Царукян жанги ғолиби июнь ойида Махачевга рақиб бўлади. Кейинги даъвогар эса мен бўламан. Жанг ноябрь ойида "Мэдисон Сквер Гарден"да ўтказилса зўр бўларди. Бу мен учун энг идеал график. Шундагина менда тикланиш, хордиқ чиқариш ва чемпионлик жангига тайёргарлик кўриш учун етарли вақт бўлади", - деди Гэтжи MMA Junkie нашрига берган интервьюсида. 

Эслатиб ўтамиз, Гэтжи-Холлоуэй ҳамда Оливейра-Царукян жанглари UFC 300 юбилей турнирининг кардидан ўрин олган бўлиб, 13 апрель (Ўзбекистонда 14 апрель тонги) куни АҚШнинг Лас-Вегас шаҳрида ўтказилади. Ислам Махачев аввалроқ июнь ойида рейтингда учинчи ўринни эгаллаб турган америкалик Дастин Порье билан жанг қилишга қарши эмаслигини айтганди.