Жавоҳир Синдаров Freestyle Chess Grand Slam турнири финалида ўйнади

Ҳамюртимиз 20 нафар шахматчи қатнашган саралаш баҳсларида 7,5 очко билан плей-офф босқичига йўл олганди. У 6 ғалаба ва 3 дуранг билан қўшимча кўрсаткичларга кўра 3-ўринни эгаллаганди. Жавоҳир Синдаров плей-офф босқичини ҳам муваффақиятли бошлаганди. У 1/8 финалда хитойлик Вей Йини 1,5:0,5, 1/4 финалда ҳиндистонлик гроссмейстер Рамешбабу Праггнанандҳани 2:0 ҳисобида таслим этганди.  

Кеча тунда ярим финал ва ҳал қилувчи финал учрашувлари ўтказилди. Жавоҳир хитойлик шахматчи - Ю Янг Йига қарши кечган 1/2 финал баҳсида 1,5:0,5 ҳисобида зафар қучди. Финалда эса словениялик Владимир Федосеев билан тўқнаш келди. Федосеев илк саралаш босқичида 8 очко билан 1-ўринни эгаллаб, плей-оффга йўл олганди. Ярим финалда яқинда Магнус Карлсен билан блиц бўйича жаҳон чемпионатида қўш ғолибликни қўлга киритган Ян Непомняшийни ютди. 

Синдаров финалнинг биринчи партиясида Федосеевдан устун келди. Аммо иккинчи партияда Владимир мувозанатни тиклади. Кейинги икки партияда кучли тенг келди. Афсуски, ғолиб номини аниқлаб берган армагедон партиясида омад Федосеевга кулиб боқди ва айнан у ғолиб сифатида февраль ойида бўлиб ўтадиган асосий турнирга йўлланма олди. 

Маълумот учун, асосий турнирда Нодирбек Абдусатторов ҳам иштирок этади. Ҳамюртимиз тўғридан-тўғри йил давомида дунёнинг бир нечта шаҳрида ўтказиладиган Freestyle Chess Grand Slam 2025 турнири иштирокчисига айланган.