Жавоҳир Синдаров миллион долларлик турнирда Магнус Карлсенга қарши дона сурди

Унда ўз таркибига юлдуз шахматчиларни жамлаган олтита жамоа ғолиблик йўлида баҳс олиб бормоқда. Ҳамюртимиз Жавоҳир Синдаров мусобақанинг бу йилги мавсумида Fyers American Gambits жамоаси шарафини ҳимоя қилмоқда. Жавоҳирнинг жамоасида қозоғистонлик Бибисара Ассаубаева, россиялик Данил Дубов, ҳиндистонлик Ниҳал Сарин, франциялик Марк-Андриа Маурицци ҳамда испаниялик халқаро мастер Сара Ҳадем ҳам бор. Синдаров жамоасининг биринчи —  Icon тахтасида дона сурмоқда.

Tech Mahindra Global Chess League турнирининг тўртинчи турида Fyers American Gambits жамоаси Магнус Карлсен бошчилигидаги Alpine APL Pipers жамоаси билан тўқнаш келди. Биринчи тахтада Жавоҳир Синдаров Магнус Карлсен билан тўқнаш келди. Учрашувда дуранг натижа қайд этилди. Бибисара Ассаубаева ҳиндистонлик Дивия Дешмуҳ билан муросага келди. Ниҳал Сарин нидерландиялик Аниш Гири билан дуранг ўйнади. 

Афсуски, Синдаровнинг қолган жамоадошлари рақибларига имкониятни бой бериб қўйди. Ушбу баҳсда Магнус Карлсен жамоаси 15:3 ҳисобида ғалаба қозониб, турнир жадвалида 9 очко билан пешқадамлик қилмоқда. Икки ғалаба ва икки мағлубиятга эга Fyers American Gambits 6 очко билан қўшимча кўрсаткичларга кўра 3-ўриндан жой олган.