Жавоҳир Синдаров — Titled Tuesday ғолиби!

Ҳафтанинг ҳар сешанба кунлари анъанавий Titled Tuesday турнири ўтказилади. Мукофот жамғармаси катта бўлмаса-да, бу бир неча соатлик мусобақада дунёнинг энг кучли шахматчилари бош соврин учун баҳс олиб боради. Улар орасида Магнус Карлсен, Фабиано Каруана, Аржун Эргаиси, Ян Непомняший, Винсент Кеймер ва албатта Нодирбек Абдусатторов, Жавоҳир Синдаров сингари шахмат юлдузларини кўриш мумкин.

Қувонарлиси, кечаги турнирда ҳамюртимиз амалдаги Жаҳон Кубоги соҳиби Жавоҳир Синдаров 9,5 очко жамғариб, Titled Tuesday чемпионига айланди. У ҳал қилувчи сўнгги турда Нодирбек Абдусатторов билан дуранг қайд этди. Бир йўла беш иштирокчи 9 тадан очко тўплаб, кейинги ўринларни банд этишди. Улар орасида Нодирбек Абдусатторов ҳам бор. У қўшимча кўрсаткичларга кўрагина 5-ўринни эгаллади. Нодирбек турнир давомида қора доналарда ўйнаганига қарамай, Магнус Карлсенни мағлуб этишни уддалади.