ЖЧ-2019 олдидан. Боксчиларимизнинг имкониятлари, таҳлил ва асосий рақиблар ҳақида

Ушбу нуфузли мусобақа олдидан ўзбекистонлик боксчиларнинг имкониятлари ва асосий рақиблар ҳақида мулоҳазаларни билдириб ўтсак. 

-52 кг. Мураббийлар штаби бир неча номзод ичидан Рио Олимпиадаси чемпиони Шаҳобиддин Зоировни жаҳон чемпионати учун танлаб олди. Ҳасанбой Дўсматов, Аброржон Қодиров, Жасурбек Латипов, Нодиржон Мирзаҳмедов каби боксчилар ушбу вазнда ҳар қандай мусобақанинг фаворити бўлишга арзийдиган боксчилар. Аммо, Шаҳобиддин айни пайтда ажойиб формада эканлигини намойиш эта олди. Умид қиламизки, мураббийларнинг ушбу қарори ўзини оқлайди ва Шаҳобиддин Зоиров Олимпия ўйинларининг олтин медали олдига жаҳон чемпионатининг ҳам энг юқори пробали медалини қўшиб қўя олади. Бу йўлда Зоировга амалдаги жаҳон чемпиони ҳисобланган кубалик Йосбани Виета қаршилик кўрсатиши кутилмоқда. Шунингдек, колумбиялик Юбержен Мартинесни ҳам ёддан чиқармаслик лозим. Умуман, осон бўлмаслиги аниқ. Ҳиндистонлик Амит мусобақага Осиё чемпиони сифатида ташриф буюради.

-57 кг вазнда Осиё чемпиони Миразиз Мирзаҳалилов мусобақада юртимиз шарафини ҳимоя қилади. Фарғона бокс мактаби тарбияланувчиси ҳисобланган Миразиз учун бу дастлабки жаҳон чемпионати ҳисобланади. Умид қиламизки, масъулиятли жаҳон чемпионатида Мирзаҳалилов муваффақиятли юришини давом эттиради ва совриндорлар қаторидан ўрин эгаллайди. Ушбу вазнда рақобат кучли. Қозоғистонлик Қайрат Ералиев шубҳасиз ушбу вазн фаворити ҳисобланади. У 2017 йили Гамбург мезбонлик қилган ЖЧ ғолиби сифатида Россияга йўл олмоқда. Шунингдек, икки йил олдин -60 кг вазн тоифасида финалгача етиб борган кубалик Альварес Эстрадани ёддан чиқармаслик лозим. Қолаверса, мезбон Россия, Мўғулистон, АҚШ ва Франция вакиллари ҳам кутилмаган "совға" тайёрлашлари мумкин. 

-63 кг. Проф рингда 5 та жанг қилишга улгурган Элнур Абдураимов варианти мухлис ва мутахассисларда илиқ кутиб олинди. Қизиғи, Элнур профессионал боксдаги 5 та жангидан 3 тасини Екатеринбургда ўтказган. Демак, ушбу шаҳар боксчимиз учун бегона эмас. 2015 йилги жаҳон биринчилигида бронза медалини қўлга киритган боксчимизнинг тажрибаси бу борада қўл келиши мумкин. Аммо, Россияда кубалик Энди Круз ушбу вазнда олтин медаль учун энг асосий даъвогар ҳисобланади. У мусобақага амалдаги жаҳон чемпиони сифатида ташриф буюрмоқда. Бундан ташқари, яқинда Панамерика ўйинларида қўлга киритилган олтин медаль Энди Крузнинг қандай формада эканлигини билдириб турибди. Шунингдек, Қозоғистондан Закир Сафиуллин бор. Умид қиламизки, Абдураимов Екатеринбургда бизни уялтириб қўймайди. 

-69 кг вазн тоифасида Осиё ўйинлари ва Осиё чемпиони Бобоусмон Батуров жаҳон чемпионатига йўл олмоқда. Бошқача бўлиши ҳам мумкин эмас. У айни пайтда терма жамоамизда ўз вазнининг биринчи рақамли боксчиси бўлиб улгурган. Энди у жаҳон миқёсида ҳам тенгсиз эканлигини исботлаши талаб этилади. Бу йўлда бизнинг "Т-62"га кубалик Рониель Иглесиас ҳалал бериши шубҳасиз. Шунингдек, қозоғистонлик Аблайхан Жусуповнинг ҳам имкониятлари чакки эмас. Шунингдек, АҚШ, Германия ва Япония вакиллари, қолаверса Озарбайжоннинг кубалик легионери Лоренцо Сотомайорни ҳам ёддан чиқармаслик лозим.

-75 кг. Асосий эътиборини профессионал боксга қаратаётган Исроил Мадримовдан сўнг ушбу вазн тоифасига ким муносиб эканлиги бўйича мухлис ва мутахассислар ўртасида баҳс-мунозаралар бўлди. Мураббийлар штаби бу борада истеъдодли Фанат Қаҳрамоновга ишонч билдиришни маъқул кўрди. Ўзбекистон чемпиони, бир неча халқаро турнирлар ғолиби ҳисобланган Қаҳрамонов учун бу дастлабки йирик турнир ҳисобланади. Умид қиламизки, у ўзига тақдим этилаётган имкониятдан фойдалана олади ва имкон қадар узоққа етиб боради. Ушбу вазнда украиналик Александр Хижняк тенгсиз ҳисобланади. Аммо, аввалроқ Украина терма жамоасининг етакчилари Екатеринбургдаги жаҳон чемпионатида иштирок этмаслиги ҳақида хабарлар тарқалганди. Шу билан бирга, ҳозирча Украина бокс федерациясининг расмий сайтида ЖЧда иштирок этадиган таркиб ҳам эълон қилинмаган. Ушбу вазнда Қозоғистон, АҚШ, Озарбайжон, Россия мамлакатлари вакиллари совринли ўринлар учун даъвогарлар сифатида эътироф этилмоқда. 

-81 кг. Ушбу вазндаги Дилшод Рўзметовни биз Осиё чемпионатидаги иштироки орқали яхши таниймиз. Бектемир Мелиқўзиевдан сўнг айнан 20 ёшли Дилшод терма жамоамизнинг ушбу вазндаги етакчисига айланди. Ажойиб атлетизмга эга ушбу боксчимиз ҳам жаҳон чемпионатида медаллар учун курашиши лозим. Биз мазкур чемпионатда Рўзметовдан медаль кутиб қоламиз. Аммо, бу йўлда ҳамюртимиз кубалик Олимпиада чемпиони Хулио Ла Круз, Озарбайжоннинг кубалик легионери Лорен Берто Альфонсо, шунингдек, Қозоғистон, Колумбия вакиллари қаршилигини енгиб ўтиши лозим бўлади.

-91 кг вазн тоифасида Санжар Турсунов юртимиз шарафини ҳимоя қилади. Икки йил олдинги жаҳон чемпионатида сенсацион тарзда ярим финалга етиб борган Санжардан бу сафар ҳам медаль кутамиз. Лекин, жуда қийин бўлади. Эрисланди Савон, Василий Левит, Ким Хёнг Ку каби рақиблар бўлган вазнда ҳамюртимиз кучли рақобатни енгиб ўтиши лозим бўлади. 

+91 кг вазнда терма жамоамиз сардори Баҳодир Жалолов юртимиз шарафини ҳимоя қилади. Ушбу таркибда энг тажрибали боксчи ҳисобланган Баҳодир учун бу учинчи жаҳон чемпионати ҳисобланади. У 2015 йили Дохада ўтказилган жаҳон биринчилигида бронза медалини қўлга киритганди. Орадан тўрт йил ўтди. Ўша Баҳодир ва бугунги Баҳодир ўртасидаги фарқ катта. Ушбу чемпионатда ҳамюртимиздан олтин медаль кутиб қоламиз. Ушбу вазнда Жалоловга принципиал рақиб - Камишбек Конкабаев асосий рақобатчи ҳисобланади. 

Умуман олганда, яқинлашиб келаётган жаҳон чемпионатида имкониятларимиз ёмон эмас. Терма жамоамиз чемпионатга тайёргарликнинг сўнгги босқичини икки ҳафта давомида айнан Екатеринбургда олиб боришди. Демак, адаптация жараёни ўтаб бўлинди. 8 сентябрь куни мусобақанинг тантанали очилиш маросими бўлиб ўтади. 9 сентябрдан эса жангларга старт берилади. 

Биз ушбу мусобақада камида 5 та медаль кутамиз. Уларнинг 2 таси эса олтин бўлиши шарт. Бунинг учун имкониятларимиз ҳам, боксчи ва мураббийларимизнинг салоҳиятлари ҳам етади. 

Мусобақада Ўзбекистон терма жамоасидан қандай натижа кутмоқдасиз? Бу борада ўз фикрларингизни ёзиб қолдиринг. 

Азиз Тўхтамуродов