ЖЧ-2022 саралаш. Сурия терма жамоасида энг кўп гол урган футболчи фаолиятини якунлади

Бу ҳақда 36 ёшли футболчи Твиттер саҳифаси орқали расман маълум қилди: "Мен 26 йил футбол ўйнадим. Энди эса хайрлашиш вақти келди. Ўйлайманки, келажак янада яхшироқ бўлади". 

Фирас Ал Хатиб терма жамоага яна ёрдам бериши мумкин эди, бироқ бош мураббий Фажр Иброҳим уни рўйхатга киритмагач фаолиятини тугатишни лозим топди. 

Терма жамоа бош мураббийи футболчининг қарорига шундай муносабат билдирди: "Аввалги турда Филиппин дарвозасига киритилган гол Фирас учун терма жамоадаги охирги гол бўлиб қолди. Мен Фирас учун хурсандман ва ҳар доим илиқ муносабатларни сақлаб қоламан. Муаммо шундаки, у ҳозир клубсиз, менга эса доим ўйин амалиётига эга футболчилар керак". 

Маълумот учун, Фирас Ал Хатиб Сурия терма жамоасида 36та гол урган.