ЖЧ-2026. Бугун Ўзбекистон - КХДР учрашуви бўлиб ўтади

Дастлабки турни ўз майдонида ўтказадиган футболчиларимиз КХДР терма жамоасига қарши майдонда саф тортишади. Учрашув соат 19:00да "Бунёдкор" стадионда бошланади.

Ўзбекистон ва КХДР терма жамоалари ўзаро 9 та учрашув ўтказишган. Ўйинларнинг 7 тасида терма жамоамиз, 1 тасида "шимолликлар" ғалаба қозонишган, 1 та баҳсда дуранг натижа қайд этилган. Тўплар нисбати - 18 га 5! 

Ўзаро ўйинларда Игор Сергеев тўпурар, у КХДР дарвозасини 3 бор ишғол қилган. Лекин Таиланд чемпионатида ўйнаётган футболчимиз олдимизга турган икки ўйинга чақирилмаган. Бунга унинг узоқ муддат давом этган жароҳати сабаб бўлган. Николай Ширшов, Марат Бикмаев, Александр Гейнрих ва Одил Аҳмедов КХДР дарвозасига 2 тадан гол уришган.

ЖЧ-2026. 3-саралаш босқич. "А" гуруҳи. 1-тур

19:00. Ўзбекистон - КХДР

21:00. Эрон - Қирғиз Республикаси

21:00. Қатар - БАА 

Маълумот учун, гуруҳимизда биринчи ва иккинчи ўринни эгаллаган жамоалар тўғридан-тўғри мундиал йўлланмасини қўлга киритади.