08 июн 09:44
Янгиликлар

Футбол

ЖЧ-2026 илк ўйинидаги рақибимиз Осиё жамосини мағлуб этди

Жаҳон чемпионати арафасида Колумбия ва Иордания терма жамоалари ўртасида ўртоқлик учрашуви бўлиб ўтди.

Учрашув АҚШнинг Сан-Диего шаҳридаги "Снапдрэгон" стадионида бўлиб ўтди. Унда жанубий америкаликлар 2:0 ҳисобидаги ишончли ғалабани тантана қилишди.

Ўйиннинг 41-дақиқасида Колумбия терма жамоаси вингери Жон Арьяс ҳисобни очди. Унга ҳужумкор ярим ҳимоячи Хамес Родригес голли узатма етказиб берди. Иккинчи бўлимда ўйинга захирадан қўшилган латераль Сантьяго Ариаснинг пасидан сўнг, ўша Жон Арьяс дублни расмийлаштириб, учрашувдаги якуний ҳисобни ўрнатди.

2026 йилги футбол бўйича жаҳон чемпионатида Колумбия терма жамоаси "K" гуруҳида Португалия, Конго ДР ва Ўзбекистон терма жамоалари билан куч синашади. Иордания эса "J" гуруҳида Австрия, Жазоир ва Аргентина билан тўқнаш келади.