ЖЧ-2026`да транспорт шоки: "Метлайф Стэдиум"га бориш 150 долларга тушади!

"Нью-Жерси Транзит" ташкилотининг қарори мухлислар учун кутилмаган совға бўлди. Эндиликда мухлислар Нью-Йоркнинг Пенсильвания вокзалидан "Метлайф Стэдиум" стадионигача поездда бориб-келиш учун 150 доллар тўлашлари керак бўлади. 

Таққослаш учун, ҳозирда ушбу йўналишдаги чипта нархи бор-йўғи 12,90 долларни ташкил этади. Демак, нархлар 11 баробардан кўпроққа ошган.

Транспорт тизимидаги бошқа ўзгаришлар:

Автобус қатнови: Муқобил сифатида йўлга қўйиладиган автобусларда бир кишилик жой нархи 80 доллар этиб белгиланди.

Имтиёзлар йўқ: Болалар, қариялар ва ногиронлиги бўлган шахслар учун ҳеч қандай чегирмалар кўзда тутилмаган.

Сотув муддати: Автобус чипталари бугун, 17 апрелдан сотувга чиқади, поезд чипталари эса 13 майдан бошлаб сотилади. Уларни олдиндан сотиб олиш шарт.

"Нью-Жерси Транзит" бош директори Крис Коллури ушбу қарорни ташкилотнинг 200 миллион долларлик дефицитини қоплаш ва харажатларни чиқариш истаги билан изоҳлади: "Биз пул ишлаб олишга ёки тамагирлик қилишга уринаётганимиз йўқ, шунчаки харажатларни қоплашга ҳаракат қиляпмиз".

Шунингдек, мутасаддилар маҳаллий аҳолини ўша кунлари иложи бўлса уйдан ишлашга чақиришмоқда ва такси ҳамда каршеринг иловаларида ҳам нархлар кескин кўтарилишидан огоҳлантиришмоқда.

Эслатиб ўтамиз, ЖЧ-2026нинг финал учрашуви айнан Нью-Жерсидаги "Метлайф Стэдиум"да бўлиб ўтиши режалаштирилган. Кўриниб турибдики, финални стадионда кўриш мухлислар учун нафақат чипта, балки йўл харажатлари жиҳатидан ҳам анча қимматга тушади.