Жейк Пол Фьюри билан жанг олдидан допинг тести топширишдан бош тортди

Машҳур лўлилар оиласининг отаси Жон Фьюри Marca нашрига берган интервьюсида америкалик боксчи - блогер Жейк Пол (4:0, 3 КО) ўғли Томми Фьюрига (7:0) қарши жанги олдидан допинг-тестдан ўтишдан бош тортганини айтди. 

Ушбу жанг 18 декабрь куни АҚШда ўтказилиши режалаштирилган.

«Шартномада жуда кўп нарса киритилган, буларни барчасини бажаришингиз лозим. Мен давом этишим мумкин эди, лекин сиёсат билан одамларни зериктирмоқчи эмасман. Фақат шуни айтаманки, улар VADA текширувидан бош тортдилар. Бу мени бироз безовта қилди, чунки шартномага шу бандни киритмоқчи эдим. Аммо у томон рад этди».

Бироқ, Фьюри жамоаси бундан ҳеч қандай муаммо туғдирмайди, аксинча, курашдан воз кечмайди.

«Менга бу барибир ёқмайди. Биз шунчаки, бу жанг бўлишини хоҳлаймиз, чунки биз уни ютишимиз мумкинлигини биламиз. Одамлар Томми мағлубиятга учрайди деб ўйлашади, улар ҳазил қилишса керак. Фюри енгилишдан кўра ўлишни афзал билади», - деди Жон Фьюри.