Жиззах белбоғли кураш бўйича Осиё чемпионатига мезбонлик қилади

Белбоғли кураш бўйича ҳар йили ўтказилаётган жаҳон чемпионатлари, халқаро турнирлар белбоғли курашни тобора ривожланишига хизмат қилаётгани бор гап. Яна бир яхши янгилик. 20-25 май кунлари Жиззах шаҳридаги "Урда" боғидаги анфитеатрда илк бор катталар ўртасида Белбоғли кураш бўйича Осиё чемпионати бўлиб ўтади.

Бирлашган курашлар олами (UWW), Осиё белбоғли кураш конфедрацияси, Жиззах вилояти ҳокимлиги, Жиззах вилояти прокуратураси, Ўзбекистон Республикаси Ёшлар сиёсати ва спорт вазирлиги, Ўзбекистон белбоғли кураш федерацияси ҳамда қатор вазирлик ва ташкилотлар ҳамкорлигида ўтказилаётган ушбу Осиё чемпионатида, қитьамизнинг энг нуфузли беллашувларида Ҳиндистон, Эрон, Индонизия, Япония қўшни Қозоғистон, Қирғизистон, Тожикистон, Туркманистон каби 20 га яқин давлатларнинг номдор полвонлари иштирок этиши кутилмоқда. 

Бирлашган курашлар олами (UWW) таснифига кирувчи белбоғли кураш бўйича ўтказилдаган Осиё чемпионатида эркаклар -57,-62,-68,-75,-82,-90,-100  ҳамда +100  кг. вазн тоифаларида куч синашишса, аёллар -52,-58,-66,-76,+79 кг. вазнларда беллашишади. 

Шунингдек, мусобақа доирасида ўша кунлари регламентга мувофиқ, Бирлашган курашлар олами (UWW) таркибидаги  Қозоғистоннинг "Қазақ Куреси" ва Қирғизистоннинг "Алыш" кураш спорт турлари бўйича ҳам Осиё чемпионати ўтказилади.  

Айни пайтда Жиззах вилоятида ушбу Осиё чемпионатини муносиб тарзда ўтказиш учун тайёргарлик ишлари олиб борилмоқда. Янги номлар, кучли полвонлар Жиззах шахридаги "Урда" боғи аренасида аниқланади.

Илҳом РАҲМОНОВ тайёрлади