Жон Жонс UFC билан шартномасини бекор қилишни сўради

Дана Уайт Жонснинг Оқ уйдаги турнирда қатнашиши ҳақидаги саволга жавоб бера туриб, бу масала ҳеч қачон кўриб чиқилмагани, жумладан, артрит, яъни бўғим касаллиги туфайли фаолиятини давом эттира олмаслиги ҳақида баёнот берганди.

"Келинг, бир нарсани аниқлаштириб олайлик, - дейилади Жонснинг баёнотида. - Аслида менинг жамоам ушбу жанг бўйича музокаралар олиб борган. Ҳа, ҳақиқий музокара. Мен ҳатто гонорар масаласида ҳам муросага тайёр эдим, лекин бунга жавобан қабул қилиб бўлмайдиган даражада паст таклиф олдим.

Ҳа, менда чаноқ-сон бўғими артрити бор. Бу оғриқли, лекин бу мен жанг қила олмайман дегани эмас. Тушунишни хоҳлайман: агар мен бу ҳақоратли пасткаш таклифни қабул қилсам, унда тўсатдан бўғимим яхши бўлиб, Оқ уйда жанг қилишим мумкин бўлармиди?

Музокаралар баъзан келишув билан тугамаслигини тушунаман. Аммо нима учун одамлар олдида ёлғон гапириш керак? Шунча йил UFC’га берганим, унвон ҳимояси, жанглардан кейин "мен билан ҳаммаси тугади" деб эшитиш алам қилади. Айниқса, жума куни менга UFC’дан қўнғироқ қилишганини ва Оқ уйда анча арзонроқ гонорар эвазига жанг қилишга кўндиришга уринишганини ҳисобга олсак.

Агар UFC чиндан ҳам мен билан барчаси тугади деб ҳисобласа, унда бугуноқ мен билан шартномани бекор қилишни сўрайман. Ўйинлар етарли".

Эслатиб ўтамиз, журналист ва инсайдер Ариэль Хельванининг маълум қилишича, Жонс Алекс Перейрага қарши жанг учун 30 миллион доллар олмоқчи бўлган, UFC эса унга икки баробар кам таклиф қилган.