Жойларда «Ёшлар кубоги» мусобақалари қизғин давом этмоқда

Ўзбекистон Жисмоний тарбия ва спорт вазирлиги ташаббуси билан мамлакатимизнинг «яшил» ҳудудларида «Ёшлар ойлиги» доирасида спортнинг стол тенниси, мини футбол, волейбол ва бадминтон турлари бўйича «Ёшлар кубоги» мусобақалари бўлиб ўтмоқда.

Қорақалпоғистон Республикаси Жисмоний тарбия ва спорт вазирлиги ҳамда вилоятлар жисмоний тарбия ва спорт бошқармалари томонидан ташкил этилган мазкур мусобақалар карантин қоидалари асосида очиқ спорт майдонларида ижтимоий масофа сақланган ҳамда ташриф буюрувчилар сони чекланган ҳолда ўтказиляпти.

Жумладан, Қарши шаҳрида вилоят спорт ўйинлари ва енгил атлетика спорт турларига ихтисослаштирилган болалар-ўсмирлар спорт мактаби базасида ўтказилган мусобақаларда 150 нафарга яқин спортчи иштирок этди.

Фарғона вилоятининг Бағдод туманида эса туман жисмоний тарбия ва спорт бўлими ҳамда болалар ва ўсмирлар спорт мактаби ҳамкорлигида маҳаллаларда истиқомат қилувчи уюшган ва уюшмаган ёшлар ҳамда БЎСМ ўқувчилари ўртасида енгил атлетика, мини футбол, волейбол спорт турлари бўйича мусобақалар ҳамда оммавий югуриш марафони ўтказилди.