"Камарни Анкалаевга бер ва бу спектакль учун узр сўра!". Рамзан Кадиров Дана Уайтга кескин мурожаат қилди

Кеча тонгда Лас-Вегасда ўтган UFC 282 турнирининг марказий жангида россиялик Магомед Анкалаев польшалик Ян Блахович билан дуранг натижа қайд этганди. Аслида ушбу чемпионлик жангида Анкалаев ғалаба қозонган, буни ҳатто унинг рақиби Блахович ҳам тан олган эди.   

"Дана Уайт, сенга нима бўлди? Сен ўз принципига эга яхши одам эдингку! Бугун сен октагондан чемпионлик камарини яққол ғалаба қозонган жангчига бермай, ўғирлаб кетдинг. Ёки сиёсат сизларни шу йўлга бошлаяптими? Жирканч ҳакамлик кимга керак бўлиб қолди? 

Дана, бу спортку, ҳалол бўл! Майрбек Хасиев (ACA лигаси раҳбари)дан ўрнак ол. Спорт сиёсатига тупуриб қўйиб, ҳалол ҳакамликни жойига қўйиб қўйди. 

Ээээй, Дана Уайт, лиганинг юзини сақлаб қол. Хатони тан олиб, камарни ҳақиқий эгасига топшир. Бу спектакль учун кечирим ҳам сўрашинг керак. Ўзинг ташкил қилган ва катта обрўга эга лиганг обрўсини сақлаб қол", — дея мурожаат қилган Кадиров.