Камилла Раҳимова Austin 125 турнирида муваффақиятли старт олди

Мукофот жамғармаси 125 000 АҚШ долларини ташкил қилувчи ушбу мусобақада теннисчимиз Камилла Раҳимованинг ҳам иштирок этиши ҳақида хабар берган эдик. Ўзбекистоннинг биринчи ракеткаси 1/16 финалда нидерландиялик Ламенс Сюзанга қарши кортга чиқди.

Икки соату 31 дақиқа давом этган баҳсда вакиламиз ниҳоят рақибасини уч сет натижасига кўра мағлубиятга учратди - 5/7, 6/1, 6/4. Нега ниҳоят? Боиси, бундан аввалги икки учрашувда Ламенс Камилладан устун келган эди. Раҳимова 1, Сюзан 2 та эйс зарбасини амалга оширган. Қўшхатоларга иккала теннисчи ҳам керагидан ортиқ йўл қўйди - 11 га 9, нидерландиялик "фойдасига".    

Таққослаш учун, Раҳимова айни пайтда дунёнинг 88-ракеткаси бўлиб турибди, 26 ёшли Ламенс эса WTA рейтингида 113-ўринни банд этган. Биринчи ракеткамизнинг 1/8 финалдаги рақибаси бугун аниқланади.