Камондан отиш бўйича Ўзбекистон чемпионати старт олди

27 мартга қадар давом этадиган мусобақада юртимизнинг энг сара мерганлари баҳс олиб боришади.

Таъкидлаш жоиз, терма жамоамизнинг асосий таркиб вакиллари ҳозирда Туркиянинг Анталья шаҳрида ўқув-машғулот йиғинини олиб боришмоқда. Мазкур мусобақа асосий жамоа учун рақобатбардош захира спортчиларини аниқлаш, уларни Ханчжоу-2022 Осиё ўйинлари ва Париж-2024 Олимпия ўйинларига саралаш мақсадида ташкил қилинмоқда.

Чемпионатда Самарқанд, Навоий, Тошкент вилояти ва пойтахтимиздан ташриф буюрган жами 50 нафардан зиёд камончилар ўз маҳоратини намойиш қилишмоқда. Кеча регламентга кўра, саралаш беллашувлари ўтказилди.