Камронбек Қадамов жаҳон чемпиони! Нодирбекда кумуш, Умиджонда бронза ФОТОГАЛЕРЕЯ

Ушбу нуфузли мусобақада Ўзбекистон терма жамоаси курашчилари ҳар уччала йўналишда юртимиз шарафини ҳимоя қиляптилар. Бугун эркин курашчилар ўз иштирокларини якунлашди. Кечаги саралаш беллашувларида Латиф Халимов ва Асрор Хўжамуродов мураббийлигидаги эркин курашчиларимиздан уч нафари жаҳон чемпионатининг медаллари учун гиламга чиқиш имкониятини қўлга киритишганди. 

Қувонарлиси, 60 кг вазн тоифасида юртимиз шарафини ҳимоя қилган Камронбек Қадамов финалда ҳиндистонлик Жаскаран Сингҳни 6-2 ҳисобида мағлуб этиб, жаҳон чемпионига айланди. У финалга қадар қувайтлик Абдулла Рашид (10-0), венгриялик Алекс Гомбош (12-6) ва туркиялик Барис Унсални мағлуб (9-0) этган эди. 

Нодирбек Жуманазаров (51 кг) финалда эронлик Али Маҳмуд Хоррамделга 0-2 ҳисобида ютқазиб, жаҳон чемпионатининг кумуш медалини қўлга киритди. Нодирбек финалгача беларуслик Владислав Зуйко, АҚШ вакили Натанаэл Жон Жесурога ҳамда арманистонлик Тигран Буниатяндан устун келганди. Яна бир курашчимиз Умиджон Искандаров (45 кг) эса бронза медали учун кечган беллашувда озарбайжонлик Юсиф Испаровга ҳеч қандай имконият қолдирмади - 11-1. Умиджон ярим финалда америкалик жаҳон чемпиони Уильям Бассеттга ютқазиб қўйган эди.