Каратэ бўйича болалар ва қизлар ўртасида Ўзбекистон чемпионати тантанали очилди

Пойтахтимиздаги «Универсал» спорт мажмуасида каратэ WKF бўйича болалар ва қизлар ўртасида Ўзбекистон чемпионати баҳслари бошланди. Жисмоний тарбия ва спорт вазирлиги, Миллий олимпия қўмитаси, Ўзбекистон каратэ миллий федерацияси ҳамда Спорт яккакурашлари бўйича Республика олий спорт маҳорати мактаби ҳамкорлигида ташкил этилган мусобақада Қорақалпоғистон Республикаси, барча вилоятлар ва Тошкент шаҳридан 800 нафардан зиёд иқтидорли каратэчилар баҳсларга киришди.

Кечаги баҳсларда 8-9 ёшли ўғил болалар ва қизлар иштирок этишди. Иштирокчилар яккалик ката ва кумите бўйича ўзаро мусобақалашди.

Болалар ва қизлар ўртасидаги Ўзбекистон чемпионатининг очилиш маросимида Жисмоний тарбия ва спорт вазирининг биринчи ўринбосари Равшан Эрматов, Миллий олимпия қўмитаси раиси Рустам Шоабдурахмонов, Ўзбекистон спорт фахрилари кенгаши раиси Баҳодир Махситов ва бошқалар иштирок этди.

Маросимда сўзга чиққан МОҚ раиси Р.Шоабдурахмонов ушбу спорт байрами билан барча иштирокчиларни муборакбод этди. Шундан сўнг мусобақани очиб бериш учун сўз Жисмоний тарбия ва спорт вазирининг биринчи ўринбосари Р.Эрматовга берилди.

- Каратэ спорти Ўзбекистонда оммалашган ва ривожланган спорт турлари қаторига киради. Бугунги кунда юртимизда 10 мингга яқин спортчилар каратэ билан мунтазам шуғулланиб келишмоқда. Ўзбекистон каратэ миллий федерацияси раҳбарияти барча масъуллар билан биргаликда ушбу спорт турини янада ривожлантириш ва уни ёшларимиз орасида энг оммавий спорт турларидан бирига айлантириш учун бир ёқадан бош чиқариб, аҳил бўлиб меҳнат қилишларига ишонамиз. Шуни мамнуният билан таъкидлаш керак, болалар ва қизлар ўртасида Ўзбекистон чемпионати иштирокчиларда катта қизиқиш уйғотди. Бугун бошланган мусобақада ҳар бир иштирокчига омад тилайман, - деди Равшан Сайфиддинович.

Миллий эстрадамиз юлдузлари ҳамда раққосаларнинг гўзал чиқишлари йиғилганларга хуш кайфият бағишлади.

Тадбирнинг энг кулминацион нуқтаси сифатида очилиш маросими тугагач Жисмоний тарбия ва спорт вазирининг биринчи ўринбосари Р.Эрматов ҳамда МОҚ раиси Р.Шоабдурахмонов мусобақа иштирокчилари билан эсталик учун суратга тушишди. Бу эса эндигина катта спортга кириб келаётган болажонлар қалбида шу соҳага бўлган қизиқишни янада ортишига хизмат қилишига шубҳа йўқ.

Финал жанглари тугагач, ғолиб ва совриндорлар ташкилотчилар томонидан медаль ва дипломлар билан тақдирланди.

Кечаги мусобақаларнинг барча ғолиб ва совриндорлари:

Яккалик ката машқлари.

9 ёшли қизлар

1. Шомуротова М.

2. Абдураимова Ш.

3. Каримова Ш.

3. Жаҳонгирова Ш.

8-9 ёшли ўғил болалар

1. Кушбаев Ш.

2. Комилов К.

3. Рустамжонов К.

3. Қадамов С.

Яккалик кумите

8-9 ёшли қизлар

1. Рустамова Г.

2. Қўзибоева Ш.

3. Зокирова М.

3. Нуриддинова М.

8-9 ёшли ўғил болалар

1. Жабборов

2. Исматуллаев

3. Исроилов

Мусобақалар эртага давом эттирилади.