Каратэчиларимиз Париждан қуруқ қўл билан қайтишди

Мусобақада дунёнинг 82 мамлакатидан 776 нафар спортчи совринли ўринлар учун баҳс олиб борди. Улар орасида Ўзбекистон терма жамоасининг 5 нафар спортчиси ҳам бор эди. 

Афсуски, каратэчиларимизнинг ҳеч бир совринли ўринларни эгаллай олмади. Ишонган спортчиларимиздан бири Садриддин Сайматов бу сафар ҳам медалсиз қолди. -60 кг вазн тоифасида эронлик Мажид Ҳасан чемпион бўлди. Италиялик Анжело Крезенсо кумуш, қозоғистонлик Дархан Ассадилов ҳамда россиялик Евгений Плахутин бронза медалларини қўлга киритишди. 

Терма жамоамизнинг қолган аъзолари Иқболжон Узоқов (-67 кг), Достонбек Отаболаев (-75 кг), Баҳринисо Бобоева (-50 кг) ва Барно Мирзаева (-61 кг) ҳам Парижда айтишга арзигулик натижага эриша олмади. Терма жамоа мураббийлари Ўктам Бекпўлатов ва Дилноза Бакирова бу омадсизлик сабабларини ўрганиб чиқишади, деган умиддамиз. 

Маълумот учун, ушбу “Премьер-Лига” турнири Токио-2020 Олимпиадаси лицензияси учун рейтинг очколарини тақдим этувчи мусобақа эди.