Каратэчиларимизнинг йил сарҳисоби

Мамлакатимизда спортга қаратилаётган улкан эътибор самарасида нафақат Олимпия ўйинларидан жой олган спорт турлари, балки шарқ якка курашларига мансуб турлар ҳам ривожланмоқда.

Айниқса, каратэ WKF билан шуғулланаётган спортчилар сони каби ушбу спорт тури бўйича қўлга киритилаётган ютуқларимиз ҳам йил сайин ортиб бораётир. Жумладан, 2024 йилги спорт мавсуми ҳам каратэ WKF спортчилари учун муваффақиятли бўлди.  

Каратэчиларимиз йил давомида 10 га яқин халқаро мусобақаларда иштирок этди ва 12 та олтин, 10 та кумуш ҳамда 34 та бронза жами 56 та медалга савзовор бўлди. Бу кўрсатгич 2023 йилга нисбатан 42 тага кўп. Ҳар бир спорт тури оммалашишида албатта миллий мусобақаларнинг ўрни беқиёс. Жорий йил каратэ WKF бўйича 4 бор турли йўналишларда Ўзбекистон чемпионати ўтказилиб, 2 минг 500 нафар спортчи қамраб олинди.  

Ўтган йил эса ушбу рақамлар 1500 нафарни ташкил этган эди. Мазкур мамлакат биринчиликлари юқори савияда ўтиши учун хорижлик ҳакамлар бригадаси таклиф этилди. Ҳар бир мусобақада шаффофликни таъминлаш мақсадида рақамлаштириш тизимига ўтилди.

Шунингдек, Ўзбекистон каратэ (WKF) ассоциацияси томонидан йил мобайнида миллий терма жамоа учун 14 бор ўқув-машғулот йиғини ташкил этилиб, уларга 500 нафар спортчи жалб қилинди.  

Яна бир эътиборли жиҳати шундаки, ҳар бир ёш тоифасидаги терма жамоаларга алоҳида мураббийлар штаби шакллантирилди. Ҳудудларда паракаратэни ривожлантириш борасида ҳам қатор чора-тадбирлар амалга оширилди. Натижада декабрь ойида илк бор паракаратэ бўйича Ўзбекистон чемпионати ўтказилди.

Умид қиламизки, келаётган 2025 йилги спорт мавсумида бош мураббий Сулаймон Юсупов қўл остида Севинч Раҳимова, Гулшан Алимардонова, Қувонч Муҳаммадиев, Абдулваҳоб Рашидов каби иқтидорли каратэчиларимиз юксак марраларни забт этади.