Кайо Борральо: "Мен Чимаевни қандай мағлуб этишни биламан"

Бразилиялик аралаш яккакураш устаси Чимаевнинг собиқ спарринг-ҳамкори ҳисобланади.  Кайо ўзаро машғулотлар чоғида "Борз"ни яхшигина ўрганиб олганини айтмоқда.

"Ўйлашимча, менда исталган рақиб билан бўладиган жангларда яхшигина устунлик бўлади. Боиси, мен 5 ҳафта мобайнида, аввалига Швеция, кейин Лас-Вегасда Чимаев билан бирга машғулот ўтказганман. Мен унинг жанг ўтказиш услубини жуда яхши ўзлаштириб олганман. Жангда нима қилиши ҳамда рақибдан нима кутишигача биламан. Машғулотларда диққат билан ҳамма ҳаракатларини ўрганиб олганман. Шундан келиб чиқиб айтишим мумкинки, мен Хамзат Чимаевни мағлуб эта оламан", - деди Борральо.

Маълумот учун, Кайо сўнгги жангини ўтган йилнинг август ойида Жаред Каннонирга қарши ўтказиб, рақибини беш раунд тўлиқ давом этган баҳсда очколар ҳисобига кўра мағлубиятга учратганди. Бу унинг UFC промоушенидаги кетма-кет қозонган еттинчи ғалабаси бўлган эди.