Кечаги 6 та медалдан кейин Ўзбекистон паралимпиячиларининг умумжамоа ҳисобидаги ўрни ўзгардими?

Кечаги кун дастурида ўзбекистонлик паралимпиячилар 1 та олтин, 3 та кумуш, 2 та бронза, жами 6 та медаль қўлга киритишди. Кечаги кун доирасида ягона олтин медали пара енгил атлетикачимиз Толиббой Йўлдошев Ўзбекистон делегациясига тақдим этди. Бу Париж паралимпия ўйинларидаги тўққизинчи олтин медалимиз бўлди. 

Бугунги кун олдидан Ўзбекистон спорт делегацияси 9 та олтин, 8 та кумуш, 6 та бронза, жами 23 та медаль билан умумжамоа ҳисобида 12-ўринни эгаллаб турибди. Кеча ҳам 12-поғонадан жой олгандик. Биз сингари 9 та олтин медалга эга Германия терма жамоаси 11-ўринни банд этган. Олмонларда биздан 3 та кумуш медаль кўпроқ. Топ-10`га якун ясаб турган Япония терма жамоаси ҳисобида 12 та олтин медаль бор.   

Хитой Республикаси 83 та олтин, 64 та кумуш, 41 та бронза, жами 188 та медаль билан рўйхатда катта устунлик билан пешқадамликни давом эттирмоқда. Қирқ иккита олтин, 34 та кумуш, 24 та бронза медалига эга Буюк Британия иккинчи ўринни эгаллаб турибди. АҚШ спортчилари 31 та олтин, 36 та кумуш, 19 та бронза медали билан кучли учликка якун ясашган. Нидерландия делегацияси 24 та олтин, 14 та кумуш, 10 та бронза медали тўртинчи поғонадан жой олган.  

Биздан аввалги ўринларни Германия, Япония, Австралия, Украина, Бразилия, Франция ва Италия терма жамоалари банд этган. Жами 63 давлат делегациялари ҳисобида камида 1 тадан олтин медаль бор. Камида 1 та бронза медалини қўлга киритган давлатлар сони 83 тага етди.