Кечаги икки олтин медалдан кейин Ўзбекистон паралимпиячилари умумжамоа ҳисобида нечанчи ўринда?

Кечаги кун дастурида ўзбекистонлик паралимпиячилар 2 та олтин медаль қўлга киритишди. Пара дзюдочимиз Шерзод Намозов икки карра, пара енгил атлетикачимиз Ҳусниддин Норбеков уч карра Паралимпия ўйинлари чемпионига айланди. Бугунги кун олдидан Ўзбекистон спорт делегацияси 8 та олтин, 5 та кумуш, 4 та бронза медали билан умумжамоа ҳисобида 12-ўринни эгаллаб турибди. Кеча ҳам 12-поғонадан жой олгандик. 

Хитой Республикаси 74 та олтин, 55 та кумуш, 37 та бронза, жами 166 та медаль билан рўйхатда катта устунлик билан пешқадамликни давом эттирмоқда. Чин юрти вакиллари кечаги баҳсларда 10 та олтин, 6 та кумуш, 8 та бронза медали қўлга киритишди. Ўттиз олтита олтин, 29 та кумуш, 19 та бронза медалига эга Буюк Британия иккинчи ўринни эгаллаб турибди. АҚШ спортчилари 27 та олтин, 33 та кумуш, 17 та бронза медали билан кучли учликка якун ясашган. Нидерландия делегацияси 21 та олтин, 10 та кумуш, 5 та бронза медали тўртинчи поғонадан жой олган.  

Биздан аввалги ўринларни Япония, Германия, Австралия, Бразилия, Украина, Италия ва Франция терма жамоалари банд этган. Жами 60 давлат делегациялари ҳисобида камида 1 тадан олтин медаль бор. Камида 1 та бронза медалини қўлга киритган давлатлар сони 80 тага етди.