Кечаги кунни медалсиз якунлаган Ўзбекистон паралимпиячилари умумжамоа ҳисобида нечанчи ўринда?

Кечаги кун дастурида уч нафар ўзбекистонлик паралимпиячи ўз омадини синаб кўрди, аммо кунни медалсиз якунладик. Бугунги кун олдидан Ўзбекистон спорт делегацияси 5 та олтин, 3 та кумуш, 3 та бронза медали билан умумжамоа ҳисобида 9-ўринни эгаллаб турибди. Кечаги кун олдидан 7-ўринда бораётгандик. 

Хитой Республикаси 33 та олтин, 27 та кумуш, 11 та бронза, жами 71 та медаль билан рўйхатда катта устунлик билан пешқадамлик қиляпти. Чин юрти вакиллари кечаги баҳсларда 13 та олтин, 12 та кумуш, 4 та бронза медали қўлга киритишди. Йигирма учта олтин, 12 та кумуш, 8 та бронза медалига эга Буюк Британия иккинчи ўринни эгаллаган. Кеча инглизлар 12 та олтин медални ўз ҳисобларига ёзиб қўйишди. АҚШ спортчилари 8 та олтин, 11 та кумуш, 8 та бронза медали билан учинчи ўринга кўтарилиб олишди. Бразилия делегацияси 8 та олтин, 4 та кумуш, 15 та бронза медали тўртинчи поғонадан жой олган.  

Биздан аввалги ўринларни Италия, Нидерландия, Австралия ва Франция терма жамоалари банд этган. Италия ҳам биз сингари 5 нафар чемпионга эга. Франция, Австралия ва Нидерландия делегацияларида 6 тадан олтин медаль бор. Жами 42 давлат делегациялари ҳисобида камида 1 тадан олтин медаль бор. Камида 1 та бронза медалини қўлга киритган давлатлар сони 65 тага етди.