Кечаги олтин медаль эвазига Жаҳон чемпионатидаги иштирокимизни нечанчи ўринда якунладик?

Яккалик мусобақасининг сўнгги куни оғир вазн тоифасида ғолиб ва совриндорлар аниқланди. Биз учун аҳамиятлиси, -100 кг вазн тоифасида юртимиз шарафини ҳимоя қилган Муҳаммадсодиқ Содиқов барча рақибларини мағлубиятга учратиб, жаҳон чемпионига айланди. У ҳал қилувчи финал баҳсида япониялик дзюдочини вазари баҳоси эвазига таслим этди. 

Шу тариқа, Ўзбекистон ёшлар терма жамоаси 1 та олтин, 3 та бронза медали билан 67 давлат орасида умумжамоа ҳисобида 4-ўринни эгаллади. Муродил Муродиллаев, Мардон Равшанов ва Алишер Саманов терма жамоамизга бронза медалларини тақдим этишди.

Медаллар жамғариш бўйича Япония терма жамоаси жуда катта устунлик билан мутлақ етакчи бўлди. Дзюдо ватани вакиллари 6 та олтин, 5 та кумуш, 2 та бронза медалини қўлга киритишди. Битта олтин, 2 та кумуш медалга эга Хитой терма жамоаси иккинчи ўринда қолди. Кучли учликка франциялик дзюдочилар 1 та олтин, 1 та кумуш, 1 та бронза медали билан якун ясашди. 

Биздан кейинги ўринларни Корея Республикаси, Грузия, Австрия, Колумбия, Озарбайжон, Германия, Италия ва Тожикистон терма жамоалари банд этишди. Жами 21 давлат терма жамоалари Тожикистондан камида 1 тадан бронза медали билан қайтадиган бўлишди. Саккиз давлат олтин медалга эга чиқди.